Joh 17 | WSK | STEP | Jesus den mu balu kutuwuram ale nu kualala loagaram ale ngatangaram, “O Ba, tom tai aratam. Nika Kuriang nup biya tuiko se nu nip biya kisokko.

John 17

Jesus ko olekem nogo ko ko Nuet ngatongam

1 Jesus den mu balu kutuwuram ale nu kualala loagaram ale ngatangaram, “O Ba, tom tai aratam. Nika Kuriang nup biya tuiko se nu nip biya kisokko. 2 Ni maingkala nu balem, nu kariimet suen biya nunga gira ma balem, nu kariimet ni nunga balu tuem mu nunga giok ale marak nunguning tom suen biya te bagomonko mu nungarukko. ^{▼▼John 17:2 John 6:37 se 6:44 ago arikko.} 3 Marak nunguning tom suen biya te bagara ko mu iwita: ni Kaem Biya nunguning ka ikisan, ale ka Kuriang Jesus Kristus beterem se tairam mu agotala ko ikisan. 4 Ura ani ali imi te bitirikko ni balem mu ani bita saperem, ale te nup biya ni kisem. 5 Tom mel suen biya me arata la, ani nup biya nikitang ago nikerak bagakasam. Se Ba, aitak pelerik kete namirikko se nikim nup biya borta aking aisuko. ^{▼▼John 17:5 Jesus Nuet ilak bagakaso: John 1:1.}

6 “Ani nika dugu duap ali imi ko kariimet sang ni nunga balu aisem mu nunga manem. Nuna nika kariimet, bare ni nunga balu aisem se nuna nika kiring karo tuman. 7 Ale aitak nuna ikisan, mel suen biya aningate mu ni ani aisem mu nuna ko ikisan. 8 Se den ni aninga manem mu ani nunga manaru saperem se ikiman, ale nongomang ningi beteman. Ale nuna ikisan nunguningta ani nikerak baga tairem, aking ikisan nunguningta ni aninga beterem se tairem masan.

9 “Ani kariimet borta nogo ko nika aru manorsam. Ani ali imi ko kariimet lilim biyala ko me ka manorsam, bare nika kariimet ni nunga balu aisem borta nunga ko ka manorsam, mu awuk, nuna nika kariimet. 10 Mel suen biya aningate mu nika, se mel suen biya nikate mu aninga. Se nuna te ani nup biya taem. 11 Ani nikate tairikkowo, ali imi te me bagirikkowo. Bare nuna mu asele ali imi te bagomonko. O Ba, ni kako nunguningkiri. Nika nip sokel ago mu te nunga sinar toko, nup ni ani aisem wore te nunga sinar toko. Umutang te asele nuna analak nangamang suwanta bagasan iwitatala, nongomang suwanta bagomonko. 12 Tom ani nongorak bagerem mu ani sokel ni ani aisem wore te nunga sinar taem. Ani ninguru nunga bituem se bo memek te me sarenga namaram. Bare nika batoga te kari maingkala sarenga namurukko balem borta kota sarenga namurukko. Mu te nika batoga te aniram mu ko nunguning butata aratukko. 13 Bare aitak ani nikate tairikko se, ani ali imi te baga se den imi balsam, ikimon ale te aninga amilmil biyala nongomang te anirukko.

14 “Nika den mu ani nungarem se taman, se ali imi ko kariimet nuna arungak memek betesan, mu awuk, ani ali imi ko mena, se turantala nuna ali imi ko mena tala. 15 Ani nika aru manorsam mu ni nuna ali imi te nunga giko me ka manorsam. Bare kari memek Satan nunga bita maguwurok bore ko, ni nunga sinar toko ka manorsam. 16 Ani ali imi ko mena, se betelatala nuna ali imi ko mena tala. ^{▼▼John 17:15 Kaem nanga sinar taukko: Mat 6:13; 2 Thes 3:3; 1 John 5:18.} 17 Se Ba, den nunguning mu nongomang ningi bitar se nuna nika kariimet nunguning ko bagomonko. Nika den mu den nunguning. 18 Ni aninga beterem se ali imi ko kariimet ningi tairem turantala, ani nunga awurem se ali imi ko kariimet ningi namasan. 19 Se nuna nunga nungumik lilim la ni kiting te betemonko mu ko, agata aimi ni kiting te betesam.

20 “Bare imi la nunga sangaruko me balsam. Mena. Ani kariimet olekem imi nika den nunga manarmon se ikimon ale ani ago ko nongomang ningi nunguning arukko wore nuna agotala nunga sangaruko ka manorsam. 21 Aninga angamang nuna suen la nongomang suwanta bagomonko. Ba, ani nikerak bagasam se ni agarak bagasam turantala, nuna ni analak nangarak bagomonko kuesam. Umu te asele ali imi ko kariimet ni aninga beterem se tairem mu ko nongomang ningi nunguning arukko. 22 Ni nikim nup biya ani aisem mu ani nungarem, se nuna te nongomang suwanta ni analak nangamang suwanta bagasan iwitatala bagomonko. ^{▼▼John 17:22 QQQ Jesus mu Nuet ko munan nanga kausam se ana karogo te baganakko: John 1:14. 2 Peter 1:3-4 se 1 John 3:2 arikko.} 23 Ani nongorak bagirik se ni agarak bagerko. Aninga angamang nuna nongomang suwanta bagomonko. Umu te ali imi ko kariimet ikimon, ni aninga beterem se tairem mamonko. Ale te ikimon, ni aninga kuesam turantala aking ni nunga ninguru kuesam mamonko.

24 “Ba, aninga angamang kariimet ni nunga balu aisem mu kuwim ani te bagirikko mu te agarak baga se aninga nikim nup biya aringimonko. Ni nikim nup biya mu ani aisem, mu awuk, girakala ali me betera la, ni ani ago ko kuerem.

25 “O Ba, ni diram nunguningkiri. Ali imi ko kariimet ni me ka ikisan. Bare ani nika ikisam, se olekem imi ni aga beterem se tairem mu ka ikisan. Ani nika dugu duap nunga manem, ale nunga manaru se lagirik se ni ago ko kuesam iwitatala, nuna nunumi ko kuemon se ani nongorak bagirikko.”

26